gambar maya rabat aki

Gambar maya rabat aki Layang ak Jelian

Rabat Aki Layang ak Jelian

Pengudah ke ngenatka diri laban ke sakit tuai dia aki aku Layang ak Jelian, udah nadai kena 15.10.2009 urung pukul 9 malam. Iya tu siku ari orang ke tuai ba menua semak pasar Betong laban kaban ke serambau enggau iya mayuh udah dulu agi nadai ari iya. Maya ke rabat nya mayuh kaban ke datai. Ari genturung ke semakai enggau kami di Semumuk Baruh, ari Skrang, ari Padeh, ari Miri, ari Sibu, Kuching, ari Saratok sereta mega kaban belayan ke semak enggau ke jauh. Aki dikuburka ba pendam Kristian Anglika Saint Augustine ba Munggu Sabut.
Arapka semengat aki begulai lantang enggau Tuhan di serga.

SEBARAT (semumuk baruh racing team)

Lebuh maya pengerami mini reggata tu tadi, rumah panjai Semumuk Baruh bisi nganjung 3 iti perau lalu ngambi bagi ba lumba sakai 10, 8 enggau 6 indu/lelaki. Sida tu ngambi nama DEWA SAKTI. Raban sida ke bekayuh nya betubuh 27 iku lalu belatih dalam kandang sebulan. Pengangkun, peneleba sereta disiplin sida tu tinggi amat lalu rindu amat meda sida ke bekayuh. Raban sida tu mujur dalam pengawa tu lalu meri tabi puji ngagai bala ke udah bebendar ngambi bagi dalam lumba tu.

Datai baru

Lama bendar udah enda nyenguk sereta ngaduka blog aku. Tanggung pengawa ba sekula ke endang mayuh ditambahka enggau pengawa bukai ke bekaul enggau nya, ngasuh jam sereta maya nya serekat bendar. Semadi nyau berandau sereta bekenangka pasal blog enggau bala kaban baru ingatka blog diri lama udah enda diabas.
Mayuh bendar mega pengawa sereta pekara ke udah nyadi sekumbang ke nya. Lalu enti ulih dikeingatka, deka dibantaika ba blog tu dudi hari ila.

Muka Gertak lama

LAban udah datai jalai, dia gertak ke endang udah dikena kami serumah pengelama 25 taun lalu dibuka kami. Kebuah pia, laban udah besemaya enggau sida ke empu tanah paya/umai ke dipansa kami nya. Enti jalai datai, kami muka gertak. Pengawa tu belabuh lebuh maya HAri Raya ti keterubah. Pengawa muka gertak tu dikereja pupuk-pupuk. Nyentuka tembu. Papan sereta tiang nya deka dibagi kami serumah nitihka aum kelia.

Ngerami jalai

Sekeda ari pengerami nya tadi. Randau maya nya sigi mayuh laban nya maya ke begulai lalu ngelegkaka pengawa bukai ke suah dikereja.

Ngerami Jalai tembu ditambun

Kena 12hb September 2009 dia kami serumah beramika jalai ke baru udah ditambun batu. Projek tu diberi sida JKR Betong. Terima kasih ke tulung sida tu. Ba aum ke sebedau hari tu, bala besetuju meli siku babi (40kg) manuk (4 iku) enggau utai irup dikena ngerami iya. PAdi nya dulu mela/emparu babi ke dibeli ari sida di Passa. Udah nya diintu ba tanah. Alalng-alang ke baka nya, dia sida ke indu sama nurun ke tanah lalu berapi ba raran endur ngintu babi tadi. Makai tengahari nya ba ruai tuai rumah lalu pengawa bukai nadai, semina begempuru makai aja.