Balai Ringkai

Gawai 2009

Udah nyeradakka ai pengayu sereta ngabang nya tadi, dia bala kami serumah lalu belabuh ngetas ranyai uti ba ruai tuai rumah. Maya tu agi mayuh bendar mega mensia ke bedau tinduk. Rami sereta rindu betundi enggau bala malam nya. Pengawa tembu jam 430 pagi.

Gawai 2009

Pukul 12 tengah malam. Nyeradakka ai pengayu. Sepengudah diri sebilik ngirup ai pengayu ba ruai diri, dia kami serumah lalu belabuh ngabang ari bilik nombor 1 nyentukka bilik 10.

Gawai 2009

Sepengudah pengawa ngalu temuai nengeri nya dia bala sama bela ngnti jam ke pukul 12 endur nyeradakka ai pengayu. Maya tu pekit nyumpit dipejalaika. Maya tu mega dikena bala nemuai ngagai sepintu-sepintu indah enda baka ke ngabang. Aku laban ke enda mindah sereta enda enggau pekit ngibun bilik endur orang datai nemuai.

Gawai 2009

Muak ke lemai 31 hb Mei nya dia kami serumah bisi ngereja pengawa ngaluka pengabang ke datai ari nengeri. Reti tu ngaluka bala kaban ke bisi datai ke gawa ba nengeri baka di Miri, Bintulu, Sibu, Kuching sereta menua bukai. Pengawa tu digaga dikena nandaka aja lalu enda lama. Taja pia pengerami nya ena ibuh disebut laban bala ke dir rumah endang gaga bendar ati meda bala ari nengeri bisi datai. Aku endang enda ulih lari ari ke diasuh orang miau bala pengabang nya tadi.

Gawai di Semumuk Baruh

Kena 31hb Mei ari nya aku, menyadi aku Stanley enggau anak aku Melvin bisi ke pendam lama rumah kami iya nya Pendam Pudu laban deka nungkun dian ba pendam ini aku Siah ak Salang, aki ichit aku Salang enggau menyadi ini aku ke bukai sereta kaban bukai ke udah nadai.

Gawai di Semumuk Baruh

Kena 30 Mei kami sebilik mulaika diri ke rumah panjai di Semumuk Baruh, Betong. Maya ke datai nya endang sigi udah mayuh bala bukai ke gawa di nengeri ke udah datai mulaika diri. Lama bendar udah aku enda begawai ditu labanka begawai di Saratok enggau Kuching. Mayuh pengawa ke udah diatur bala komiti rumah panjai dikena ngintu gawai baka ke taun tu. sekeda ari nya baka pekit nyumpit, pekit mua jai, pekit nyura nembiak, pekit karaoke, pekit futsal enggau ke bukai. Ba mata aku, manah bendar pengawa ke baka tu diatur ngambika dikena mensia limpang ari ke ngirup belama. Tu mega tau ngerapitka agi kaul kami serumah enggau pangan diri kelimpah ari ke dikena ngerami gawai.