Bahasa Iban SPM (6356)
Mujur, laban kertas Jaku Iban SPM udah diambi nembiak kena 5hb Disember 2008 tu tadi. Baka nya mega nadai ninga orang bisi nusi sereta madahka penanggul ke bisi nuntung. Arapka ba taun ti deka datai, mayuh agi nembiak kitai Iban ke ngambi subjek tu ba ikas SPM.

Mesyuarat Penataran Bahasa Iban SPM 6356

Kena 23 ngagai 24 hb September 2008 tu tadi, dia bisi kurang lebih 45 iku bala pengajar Jaku Iban ngulu aum tu ti diatur Lembaga Peperiksaan Malaysia di Hotel Premier, Sibu. Aum tu dikena sida LPM mantaika format B Iban SPM ngagai bala pengajar. Kelimpah ari sida ke ngajar, En Francis Mancha ari SPA enggau En Raymond Braoh mega bisi enggau ngulu aum tu. Sida bisi mega madahka keretas tu udah dipesetujuka "Central Curriculum Committee" kena 4 hb Ogos 2008. En. Geoffrey Singgon enggau En. Adzman Talip ke nganjung lalu mantaika keretas nya ba sida CCC. Diatu, reti nya Jaku Iban udah sah diajar sereta diambi ba peresa SPM 2008. Taun tu taun keterubah iya di Sarawak, di Malaysia sereta di dunya! Aum nya mujur bendar lalu semua pengajar ke bisi datai nya madahka pemuas ati sida laban udah meda format sereta nyata mih peresa nya dipejalaika taun tu. Meri tabi puji ngagai bala ke bisi datai taja pan aum nya semina dua hari aja.

Enti enda kitai, sapa?
enti enda diatu, kemaya?

Hari 6 (13.09.2008).Pukul 4:30 lemai. Ujan!

Aku nemuai ke Semumuk Baruh. Ngabas aki aku. Lama amat udah enda rembus. Nyau lelengau. Aku kia ngena basikal(ensikal) . deka mai anak aku dua iku tang meda hari jai amat gaya, lalu enda nyadi. Benung ke ngayuh basikal nya datai ba simpang jalai baru ujan labuh ngemalat-mlaat nya! Pajak ke aja mih udah nyauka datai pia ko ati.
Di rumah enda mayuh mensia. Bala petunggal aku udah nitihka orang ke Mangut ngulihka buntal. Aki aku gerai semina enda ulih angkat bejalai agi. Nyau tuai mih nya, lebih 90 taun. Ini aku pan bisi dia baru pulai ari umai. Maya ke datai, bala anak petunggal aku benung bemain bol ba tengah laman rumah kami. Enti agi biak kelia, enda aku pedulika hari ujan, laban mih ketegal deka bemain hari ujan. Jalai agi baka nya mega, luchak. Semina ke enda luchak nya jalai gertak kami!
Umai baru udah dipanchit. Nyau layu bala sida melai enggau lalang. deka ngambi gambar mayuh agi, enda ulih laban hari balat ujan. Aku semina ngambi gambar ari rumah aja. udah nya berandau enggau aki, ini sereta enggau apai Nyuk aja.
Ila kitu baru, ngambi gambar mayuh agi lalu meri penerang.
Buah mayuh udah bebungai lalu bisi sekeda nya diempa tupai. Gambar ke diambi aku nya nyengkaum kereban ke dikena orang ngaduka padi sereta pesaka ke diibun kami. Lalu bala nembiak ke enda ngelala kereban nya tau betanya ngagai sida ke tuai. Ila mega aku mantaika agi rengka lama ke bukai.

Jalai Semumuk Baruh

Hari tiga tu tadi (10.09.2008) aku bisi ke Semumuk nengah jalai baru. jalai nya nyau udah majak luchak lalu patut diaduka baru. Surat ngagai sida ke patut endang udah diasurka lalu diatu bedau bisi saut ari sida. Bala sigi arapka pekara tu diputarka jampat agi.

Jaku Iban

Bisi udah perambu Jaku Iban deka dikemansangka agi ngagai ikas Institut Perguruan.
Reti nya, bisi peluang nembiak kitai Iban ke keterubah iya ngambi SPM taun tu napi program nya. Enti nadai penanggul, program nya deka dipenyadika dalam taun 2010 ila. Arapka mujur.
Udah nya ila baru bisi pansut pengajar ke ngajar Jaku Iban ke bisi satipikit. Bala pengajar Jaku Iban ke diatu, deka dikemansangka mega sereta diberi latih ngambika ulih ngenataika diri ba ikas diploma lalu sama-sama bulih satipikit nya.
Sama-sama mih kitai besampika program tu nyadi ngambika Jaku Iban kitai mansang seseingkang agi.

Yahoo! Mail (salangtimothy)

Yahoo! Mail (salangtimothy)

Jaku Iban SPM 6356

Dua minggu ke udah aku bisi ninga berita manah ari kaban aku. Sepengudah nyauka sepuluh taun, diatu Jaku Iban ba peresa SPM udah nyata dikemendarka KPM menua kitai! Taja berita enda ditemu mensia mayuh baka orang ke nemu berita pengawa bepilih di Permatang Pauh, berita tu ngasuh sekeda orang baka sida ke endang mekuhka jaku Iban tu gaga sereta temegah ati. Kelebih agi bala sida pengajar ke ngajar jaku nya enggau sida pengajar ke udah penchen ke udah kiruh mesuka pekara tu ngagai ikas ke tinggi agi. Tu nyadi siti agi ari pemujur jaku kitai setanding enggau jaku bukai ke endang udah lama diajar/dipelajarka. Terima kasih ngagai semua pengajar tauka orang bukai ke sama ngambi bagi dalam ngangkatka jaku tu. Udah tu kini ke penunga kitai?

Bisi ninga perambu baru deka ngasurka jaku tu ngagai ikas Diploma ba palan pematih pengajar. Utai tu tau nyadi laban sepengudah nembiak taun tu (2008) ngambi peresa Jaku Iban SPM, sida ila lalu bisi sijil dikena ngambi kus nyadi pengajar ke ngajar Jaku Iban. Ke diatu bala pengajar ke ngajar Jaku Iban tau dikumbai kitai nadai sijil ngajar jaku nya laban ke bedau bisi tikas iya ba SPM. Pengajar ke ngajar diatu nya belabuh ari pengeran ati, peneleba diri sereta deka meda jaku nya mansang lalu enggai tinggal ari jaku bukai. Taja pia, bala pengajar ke diatu bisi ditagaka kus ngambika bisi dikena sida ngulihka sijil ngajar Jaku Iban. Arapka semua perambu tu nyadi nyata enti enda dua tiga taun ti deka datai awakka udah nya mega. Amat mih jaku kitai Iban tu udah dikelala semua bansa. Ni kitai nemu, dudi hari ila Jaku Iban tu bisi diajar ba tikas universiti! Semua nya tau nyadi enti nyema bansa kitai kelebih sida ke bebendar mekuhka jaku nya sama-sama betulung sereta besukung pangan diri ngangkatka Jaku Iban.

Tampai kitai anang naka ke udah, tang enda tau enda jauh ke agi.

Tusun Bilik Rumah Panjai Semumuk Baruh

Bilik 1 : Alfred Buma (bilik niang Donald Buma)
Bilik 2 : Ula ak Bunyau
Bilik 3 : Kadat
Bilik 4 : Jini Brodi (menantu Bejie)
Bilik 5 : Tapa Ganing
Bilik 6 : Layang Jelian (bilik niang James Anin)
Bilik 7 : Braoh
Bilik 8 : Zamry Lamat
Bilik 9 : Mit Anjie (bilik niang Anjie)
Bilik 10 : Belanda
Bilik 11 : Danggat
Bilik 12 : TR Neclios Ringkai
Bilik 13 : (lekat daun) Ah Wai

Tusut

Tusut orang Semumuk Baruh.

• Mawar Biak “Ragai Ngerang”* x Lena = Gallau
• Gallau x Chandu = Imban, Ladang, Sulau
• Ladang x Bunyau = Kunchit
• Kunchit x Umos = Unggang “Lebor Menoa”
• Unggang “Lebor Menoa” x Sangan = Mulok, Luta, Ketit, Sulan, Ramih, Selaka
• Sulan x Awan = Bunyau, Maoh, Undu
• Undu x Empari = Tangkun “Resa”, Pengarah Ringkai, Nyanggau “Lang Laut”, Penghulu Biju, Eddie "Tungku Besi"
• Pengarah Ringkai “Bedilang Besi” x Itu = Setiri
• Setiri x Salang = Siah, Remah, Bunyau, Branggom, Dujung
• Siah x Layang = James Anin
• James Anin x Juliana Bragai = Stanley Geraman, Timothy Salang, Diana Selaka, Larry Mahathir Kedit

Tu gaya tusut ari Mawar Biak ke nurun ke sida apai aku sereta bala sida ke di Semumuk Baruh. Tusut ngagai bala bukai ke ba rumah panjai nya, dudi ila deka dibantai belabuh ari tuai rumah orang Semumuk Baruh.

Balai Ringkai

Tuju blog tu digaga laban deka mai bala mayuh ke mansa ngelala siti ari rumah panjai di menua Betong, Sarawak. Kelimpah ari nya, mai bala meda pengawa ke dikereja nembiak redak rumah panjai nya besehari-sehari. Rumah panjai tu dikumbai orang Semumuk Baruh lalu enda bangat jauh ari pasar Betong empu. Rumah panjai tu enda panjai semina 13 pintu aja. Bala ke diau di rumah panjai tu enda mayuh lalu sigi ukai orang bukai enggau pangan diri endang kaban belayan ke semak. Taja pan rumah tu enda jauh ari pasar Betong, iya bedau bisi jalai alun ke menyana nuju rumah. Semina dalam tahun 2007 lebuh bala kontraktor ngelasi Sungai Semumuk, dia bala minta ban digaga besai lalu dijadika jalai. Diatu jalai (ban) nya endang mansa rumah panjai. Taja jalai nya bedau meruan, tang manah agi mega ari ke enda datai jalai. Diatu enti maya kemarau, jalai nya ulih ditengah lalu muto ulih nuntung di kaki tangga. Bala sida tu serumah endang agi ngemeranka pengawa bumai betaun, nangkal getah, bekebun, gawa perintah sereta pengawa rama ke bukai.