Pendam Kena Sengkubang

Kena 27hb Dua tu tadi, dia rumah panjai orang di Kamidan Awik, Saratok begau laban pendam kristian ke di seberai rumah kena sengkubang orang. Penyampau pendam ke kena sengkubang

nya bisi 11 iti.

Bengkel Penataran Format Baru Bahasa Iban PMR (Tikas Bahagian Betong)

Dikena nyempulang penatarn ke digaga di Miri dia aku enggau Pengajar Daniel Embie udah mujur ngaga bengkel tu di Saratok kena 12.03.2009 tu tadi. Bisi 20 iku pengajar ke datai ari 8 buah sekula ke bisi ngajar subjek tu datai. Taja bengkel tu digaga sehari aja, iya mujur endur ngirika penemu sereta berita baru ngagai bala pengajar ke datai. Kelimpah ari nya, maya bengkel, bala pengajar udah mujur ulih ngaga dua set keretas tanya ngambika bisi dikena ba sekula diri.
Bala pengajar minta bengkel ke sebaka baka tu digaga baru sekali agi ngambika ulih ngemayuhka agi keretas tanya nya lalu ulih nemu penaka enggi sekula siti-siti.
Terima kasih ke penatai bala pengajar ke ngulu bengkel sehari nya.

Penataran Format Baru Jaku Iban 2009

Kena 23 ngagai 26 hb Dua 2009 dia sida ari Lembaga Peperiksaan Malaysia udah mujur ngatur pengawa tu di Parkcity Everly Hotel di Miri. Maya nya suba kelimpah ari bala pengajar dia bisi raban ari opis mega datai baka En Padang Luna ari BPK, Putrajaya, En Francis Mancha ari SPA, En Duncan Luta ari UPP enggau Dr Linton Jerah Britten ke ngarika bala Pengetua.
Bala pengajar maya nya suba dipadahka pasal format baru keretas peresa Jaku Iban PMR. Sida ke meri licha maya nya iya nya En Adzman Talip, En Masrol Saminggon, En Geoffrey Singgon enggau En Jain Chee.
Kelimpah ari ke ningaka licha, bala pengajar mega diberi bengkel ngaga tanya nitihka gaya sereta format baru nya tadi.

SPM Bahasa Iban

Pemutus peresa udah pansut. Nya tau ditemegahka bala kitai laban pemutus peresa nya nyadika siti ari singkang kitai dalam ngemansangka jaku tu ke mua agi. Arapka taun tu enggau taun ke deka datai, mayuh agi nembiak enggau orang luar (persendirian) ke ngambi peresa subjek tu. Meri tabi puji ngagai bala nembiak enggau orang luar nya ke udah napi sereta ngambi peresa SPM Bahasa Iban keterubah iya.

PMR 2008

Bala pengajar sekayu menua Sarawak tu berasai temegah amat ati ketegal pemutus peresa PMR Jaku Iban (37/1) taun 2008. Ari sida ke gawa ba JPN dia sida madahka pemutus peresa subjek Jaku Iban PMR nyadi pemutus peresa ke pemadu manah di menua Sarawak tu ari subjek ke bukai.

Tabi puji ngagai semua pengajar Jaku Iban ke udah enggau liat ati mekuhka jaku tu sereta bebendar amt ngajar dataika bulih pemutus ke baka tu. Tabi puji mega ngagai bala nembiak ke udah ngambi peresa Jaku Iban laban udah berani napi semua penanggul dalam belajarka jaku tu ari Pom 1 ngagai 3.

Pengaga tu ukai pengaga siku-siku aja tang ke pengaga ke semua nyengkaum bansa kitai nya empu. Arapka taun tu pemutus peresa nya tau mujur agi ari ke udah. Pia mega arapka bala pengajar enggau nembiak bebendar agi ngajar sereta belajarka jaku tu.

Bahasa Iban SPM (6356)
Mujur, laban kertas Jaku Iban SPM udah diambi nembiak kena 5hb Disember 2008 tu tadi. Baka nya mega nadai ninga orang bisi nusi sereta madahka penanggul ke bisi nuntung. Arapka ba taun ti deka datai, mayuh agi nembiak kitai Iban ke ngambi subjek tu ba ikas SPM.

Mesyuarat Penataran Bahasa Iban SPM 6356

Kena 23 ngagai 24 hb September 2008 tu tadi, dia bisi kurang lebih 45 iku bala pengajar Jaku Iban ngulu aum tu ti diatur Lembaga Peperiksaan Malaysia di Hotel Premier, Sibu. Aum tu dikena sida LPM mantaika format B Iban SPM ngagai bala pengajar. Kelimpah ari sida ke ngajar, En Francis Mancha ari SPA enggau En Raymond Braoh mega bisi enggau ngulu aum tu. Sida bisi mega madahka keretas tu udah dipesetujuka "Central Curriculum Committee" kena 4 hb Ogos 2008. En. Geoffrey Singgon enggau En. Adzman Talip ke nganjung lalu mantaika keretas nya ba sida CCC. Diatu, reti nya Jaku Iban udah sah diajar sereta diambi ba peresa SPM 2008. Taun tu taun keterubah iya di Sarawak, di Malaysia sereta di dunya! Aum nya mujur bendar lalu semua pengajar ke bisi datai nya madahka pemuas ati sida laban udah meda format sereta nyata mih peresa nya dipejalaika taun tu. Meri tabi puji ngagai bala ke bisi datai taja pan aum nya semina dua hari aja.

Enti enda kitai, sapa?
enti enda diatu, kemaya?