Muka Gertak lama

LAban udah datai jalai, dia gertak ke endang udah dikena kami serumah pengelama 25 taun lalu dibuka kami. Kebuah pia, laban udah besemaya enggau sida ke empu tanah paya/umai ke dipansa kami nya. Enti jalai datai, kami muka gertak. Pengawa tu belabuh lebuh maya HAri Raya ti keterubah. Pengawa muka gertak tu dikereja pupuk-pupuk. Nyentuka tembu. Papan sereta tiang nya deka dibagi kami serumah nitihka aum kelia.

Ngerami jalai

Sekeda ari pengerami nya tadi. Randau maya nya sigi mayuh laban nya maya ke begulai lalu ngelegkaka pengawa bukai ke suah dikereja.

Ngerami Jalai tembu ditambun

Kena 12hb September 2009 dia kami serumah beramika jalai ke baru udah ditambun batu. Projek tu diberi sida JKR Betong. Terima kasih ke tulung sida tu. Ba aum ke sebedau hari tu, bala besetuju meli siku babi (40kg) manuk (4 iku) enggau utai irup dikena ngerami iya. PAdi nya dulu mela/emparu babi ke dibeli ari sida di Passa. Udah nya diintu ba tanah. Alalng-alang ke baka nya, dia sida ke indu sama nurun ke tanah lalu berapi ba raran endur ngintu babi tadi. Makai tengahari nya ba ruai tuai rumah lalu pengawa bukai nadai, semina begempuru makai aja.

Tamat Ngajar

Pengawa tamat ngajat tu diatur ba Dewan Tan Sri Alfred Jabu di SMK Saint Augustine Betong. Bisi 14 iku sida ke lelaki tamat ngajat malam nya. Semua sida tu diajar guru ngajat sida En Alfred Buma. Rami malam nya asaika begawai laban semua main ke diayanka endang ngajat magang nyengkaum ngajat bebala mayuh. Meri tabi puji ngagai sida tu laban udah sanggup belajar sereta ngena chara nya, ngetanka main asal bansa kitai.

Rabat

Kena 28 Jun 2009 tu tadi dia petunggal aku Chanda ak Ganing udah nadai ketegal kanser. Iya nadai urung pukul 2 tengahari nya. Bala ke di rumah lalu madahka aku pasal penusah tu lemai nya mega. Malam nya aku ke rumah laban kami serumah baum ke pengawa ngintu niang tu tadi. Aum malam nya bekaul enggau pengawa bepadah, sapa bagi orang ke bejaku, pesan nengah radio, lauk, rumah panjai ke dipadah enggau ke bukai.

Baum

Kena 14 Jun 2009, pukul 5 lemai Tuai Rumah kami di Semumuk Baruh bisi ngangauka bala bebai baum. Aum nya digaga maya nya ngambika enda badu nyau kelalu laun jauh malam. Pekara ke dikerandauka maya nya iya nya pasal duit ke ulih maya pengerami gawai tu tadi ari mayuh macham pekit. Penyampau ke udah dikira nya bisi RM1037.00. Duit tu deka disimpan ba bank nyadika duit gerempung rumah. Pekara ti kedua nya iya nya pasal tusun umai / bagi umai Tanjung Semumuk. Bisi 10 pintu ke endang deka bumai taun tu lalu bagi tanah nya udah diatur tuai rumah enggau manah. Pekara ti ke tiga nya pasal orang ke deka meri bantu nambun batu ba jalai baru ngagai rumah. Belanja ke dibisi disebut nya RM20 ribu. Bala bela gaga niga tu lalu tulung tu dikena ngaduka genturung jalai ke endang bedau ditambun / jai.
Aum lemai tu mujur bendar lalu Tuai Rumah Nicholas pan gaga meda tulung sereta sukung ari nembiak redak iya.

Betemu enggau Clement Joys

Kena hari 3 (10 Jun 2009) pengajar Samuel bisi ngangau ke aku ngagai rumah iya ngabang gawai. Maya nya bisi siku temuai iya nya penyanyi kitai Iban, Clement Joys, bisi mega datai. Kelimpah ari iya bisi mega siku pengajar ari Sekula Teknik,Pengajar Majah enggau DJ Jimbu sebilik datai. Randau maya nya endang mayuh amat ke besangkut paut enggau pengawa belagu. Dalam randau kami nya, aku bisi nyelepak mimit pasal atur sepil ke dikena ba lagu kitai Iban sereta enggau sekeda leka jaku ke enda tentu engkeman ke suah dikena mega dalam lagu kitai Iban. Clement bisi bendar pengarap senentang pekara tu klebih agi ngagai sida ke ngaga lagu / lirik baka Pengajar Samuel empu, ulih ngena atur sepil sereta leka jaku ke engkeman dalam lagu iya. Reti tu iya deka nyadi siku ari kitai ke sama betulung ngemansangka Jaku Iban nengah lagu iya. DJ Jimbu pan sama baka iya mega pengarap ngambika bisi dikena iya lebuh ke bejaku ba radio. Gaga amat ninga penemu seduai nya. Arapka pekara tu nyadi, enti enda mayuh, buji mimit nya dulu pan pama mih ngambika lagu kitai tau mansang disempulang ngena Jaku Iban ke manah.
Kelimpah ari nya, malam nya mega baru aku ingatka Clement Joys tu junior aku maya ba MPR/IPR suba. Kami duai iya kala bemain band lebuh rami sekula di Bayong, Sarikei.

Raban RTM 'Simfoni Alam'

Kena lemai 4hb Jun, dia raban Simfoni Alam ari RTM ngatur pengawa betanya saut enggau Tuai Rumah Juliana Bragai Bedus. Pengawa tu dikereja laban kenu ku sida RTM nya jarang amat nemu indu ke nyadi tuai raban bansa (Tuai Rumah) ngelama tu. Nambahka nya kenu ku sida, ngelamatu suah agi sida ke lelaki nyadi tuai. Pengawa betanya saut tu diatur sepengelama setengah jam lalu diatur ba bilik Tuai Rumah Juliana empu.

Gawai di Kamidan Jaya, Awik, Saratok

Udah tembu pengawa ngabang ba rumah Semumuk Baruh di Betong (1 Jun 2009) kami sebilik lalu mutarka diri ke rumah panjai indai aku di Kamidan Jaya, Awik ,Saratok. Indai aku enda enggau kami ngintu gawai di Betong laban taun tu iya udah dichiri nyadi tuai rumah di Kamidan Jaya. Ketegal tu iya enggai nyadi ninggalka rumah. Pengerami gawai ditu endang sebaka baka ke di Semumuk Baruh semina ke lain agi nya laban rumah panjai Kamidan Jaya tu rumah baru lalu digaga ari batu. Kena 3 hb Jun, bisi bala raban ari RTM Kuala Lumpur ke datai deka ngerikut pengidup di rumah panjai Iban. Program tu dikumbai 'Simfoni Alam'. Raban sia RTM tu ke datai bisi 5 iku. Sida ngambi gambar, betanya saut sereta gerikut ngena kamera tu pengelama 5 hari. Ex-kaunselor Jamu ak Mail udah dipilih bala ngarika sida serumah ditanya saut ketegal pemujur iya dalam pengidup sereta pengawa iya ke nyadi kontraktor. Kelimpah ari nya indai aku Pn Juliana Bragai Bedus mega bisi ditanya saut sida RTM tu laban jarang bisi orang indu ke nyadi tuai rumah. Ba menua Saratok bisi udah 5 iku tuai rumah indu nyengkaum indai aku empu lalu indai aku nya nyadi tuai rumah indu ti keterubah iya dalam Batang Awik.
Nyempulang penatai sida tu, dia bala kami serumah di KamidanJaya sama bela besetuju ngatur pengawa ngalu penatai sida nya sereta lalu ngatur pengawa "Ngiling Tikai". Tu ngambika bisi adat asal kitai Iban ke tau dirikut sida ke datai nya tadi.

Gawai 2009

Udah kujuk dibuka dia lalu pengawa rama baka ngajat, kuntau enggau betanda dibantaika. Maya tu bala rami agi ari ke udah laban rindu begulai enggau pangan diri. Bebuti eggau betundi nya endang enda alah sebut.

Gawai 2009

Udah pengawa muka kuta nya dia bala pengabang duduk lalu disiburka enggau ai basu kaki. Udah nya lalu diasuh muka kujuk ke udah ditanka ba tengah ruai.

Gawai 2009

Pagi 1 hb Jun nya urung iya pukul 10 pagi dia bala kami serumah ke ari setak ili datai ngabang ngagai kami ke di setak ulu. Maya tu pengawa baka muka kuta enggau muka kujuk dipejalaika dikena kami ngingatka adat aki ini kitai. Kelimpah ari nya endur bala rebak baru ke rinduka jaku Iban belajar bejaku ngena jaku besebar sereta leka main kitai Iban. Tu siti jalai jaku kitai nya dikemansangka ngagai sida ke nembiak. Aku taun tu enda tentu nyadi lemambang laban ngelakka bala manuk sabung aku nguji pengelandik diri bekau ke belajar ari taun ke udah. Ba post tu kitai meda gambar pengabang setak ili datai lalu pengawa ngenan kuta sereta muka iya dipejalaika.